Es si nid nume Chelsea-Boots tschuld!

Er steckt dr Schlüssu ids Schloss u miteme Ruck stosst er Türe uf. Äs isch nume Tür zu sire Zwöitwohnig. Auso eignetlech ischs nid mau sini Wohnig. Es wär ja scho chli Wahnsinnig ä Wohnig z'Paris z'ha, we me dr gröscht Teu vom Jahr z'Züri läbt. Er het bi eim vo sine Ufenthaute z'Paris ä schöni Pariserin, ire vrrouchte Bar im 14.Arrondissement, Quartier du Montparnasse lerekenne. 

D'Cloé, hmmm... si het ne sofort ume Finger gliiret. Er het gwüsst, dass sie weiss wie Ihri Reitze iisetze, dass er Ihre us dr Hand frisst. Es isch ihm aber so öppis vo gliich gsi u er hets eifach gnosse.

Wo ner über Türschweue louft... schmöckt er se scho. Ds süesse, feine Parfüm wo nume si cha trage. Genau das, wo ihm vor 2i Jahr dr Atem het groubt... Ir einte Hand si schwarz Vintage-Läder-Weekender u ir angere ä Struss Marguerites woner ame Händler ame Strassestand het abkouft. 

Äs isch ändi März u für di Jahreszit scho relativ warm. Näbe de vrwäschne Jeans, u sim schwarze V-Neck-Shirt (wo viilich äs bire-bitzi z'äng isch), treit er sini lieblings Chelsea-Boots und wie geng dr dunku-khaki Parka. Er isch Journalischt u liebts sini Utensilie aui i dere Jagge chönne z'vrstoue. Sie isch ungerdesse wi zu sire zwöite Hut worde, me kennt ne nid angers. Dr eint Jaggesack isch vo sire Ur-Aute Leica scho däwä vrpület, aber ohni die vrlater z'Huus nume ungärn.

U da sitzt si, d'Bei aazoge ufem breite Fänschtersims. Ä grob glismete Strickpulli, het si anne u bluti Bei. Näbe Ihre äs Whiskeyglas u ä quaumendi Cigarette. Das ersch 5i am Abe isch stört i dere Wäut niemer. Es louft "like real people do" vo Hozier, er chas chum erwarte sä i sine Arme z'gschpüre. "Honey just put your sweet lips on my lips. We should just kiss like real people do!" D'Luft knischteret, di eroteschi Schpannig würd sogar ä Blinde erkenne. Zunge inenang vrschlunge, ässe si gägesitig dr Atem vo änang. Dr Pulli ligt ufeme Hüfeli am Bode... sie liebt sini chli lengere dunkle Haar u lat ihri Händ drin vrschwinde.

Wörter bruche si kenni, sie wüsse was dr anger brucht. Dsch vom erschte Momänt a, so gsi. Er lüpft se uf u treit se düre läng, schmau Gang its Schlafzimmer. Näbem Spitzemüschterli, tanze Liecht-Spieglige vom Chronlüchter uf ihrer Hut. Sini Zunge nimmt di Usevorderig gärn a. Sini Fingerspitze brönne fasch uf ihrem Körper u si chas nid lasi ihri Negu i si Rügge z'chraue...

Dr dürtrainiert Banker, wo eigentlech ihre Chéri isch, cha si ungerdesse guet its Resärve-Schublädli vrbanne. Sch gäbig dä Mönsch a ihrer Site z'ha, er isch Gradlinig u si weiss was si a ihm het. Aber glich wett si dä ufregend, frömd Maa wo jetz grad a ihrem Bettändi chnöilet u ne Foto vo ihre mach... wie sie sech da i de Lintüecher wäuzt, nid misse! Das Neue lat se über aui Konventione wäg luege. Sch wi zure Sucht worde, es guet ghüetets Gheimniss u ja, viilich o es bitzi ä Kick... wöus viilich eines Tages chönnt usecho!

Es isch dunku worde ir Stadt, aber dür di viile Liechter isch aues ine goldige Schimmer ghüllt! Er steit ads Schmidiiserne-Gländer glähnet ufem Balkon u roucht Eini. Si Köper nimmt d'Farb vor Strasselatärne a u glänzt ganz fiin. Es het afa rägne, perfekt für sech nach some heisse Momänt abzchüehle. We da hinger ihm nid d'Cloé würd stah u nim mit ihrne weiche Lippe, d'Tröpfli vor Wirbusüle küsse...

Ä Chäuer?

Im 16ni wohnt dr Lionel. Ä unschiinbari Tür dänkt me, we me dran vrbi louft. Viilich hesch se bis jetz no nie beachtet!? u nid mau es Lüti hets, vrschwige de nes Namesschiudli. Bruchts, we eim öpper wett cho bsueche! Unbedingt, oder!? S'gseht chli us, aus chiemt me dür di Türe diräkt ine nasse, chaute Chäuer, wo härdelet u nach Härdöpfu schmöckt!?

Dr Lionel isch Ändi 20gi u es isch nid sini erschti Wohnig. Nei, er isch scho rächt ir Wäut umecho. Ihm isch z'Wohne aber nid so wichtig, är brucht eifach es Dach überem Chopf, dass er nid nass Ohre überchunnt. Aber da di Designermöbu u dä Luxus geit ihm am Arsch vrbi. Ihm si angeri Wärte wichtiger!

Er hets aber de scho gmögig iigrichtet. Sch aues mit fein schmöckigem Houz täferet. Er het ä grosse Tisch mit eme Bank u paarne Schtüeu ir Chuchi. Dsch eine vo dene Wärt: Gseuigkeit! Mit Fründe ir Rundi hocke, eine-zwe zäme trinke u über Gott u d'Wäut philosophiere!

Näb däm grosse Ruum, het er no nes chliises Schlafzimmer mitere gäube Gummode woner sini Chleider drin vrstout. Er fingt Chleider u das ganze Mode-Züg zimli ä Brunz u totau überbewärtet. O für das, nimmt er nid öppe gärn Gäud id Hang! Es notwändigs Übu haut!

No zum Lionel, er fingt si Name zimlech schrecklech u überhoupt nid männlech. Aber si Muetter het gfunge ds sigi doch süess für ds Bebe mit de dunkle Häärli u de Chugu-Öigli... wosi ne nach dr Geburt i de Arme het gha! Er fingt, sie hät söue z'Hiirni ischaute bi der Entscheidig, wöu er heig jetz di Konsequänze z'trage! Aber äbe, ds het scho dr eint oder anger Philosophisch-Abe gfüllt.

Dr Lion wi ner sech lieber nennt (so wägem männlech), het di Obligatoreschi Schueuzit ohni Problem dürebracht, s'het ne aber Eländ aagschnäggelet u er isch wäuts froh gsi woner nach 9jahr het chönne dr Rucksack ine Egge pängle! Da er so guet isch gsi ir Schueu, hei sini Eltere grosses vorgha mit ihm. Nach langem hin u här, het er de chönne es Ustuusch-Jahr z'Ängland ushandle, wo nim für sini Bruefswahu chli ziit vrschaft het!

In Ängland isch du dr Lion Voujährig worde u de grad für nes Ziitli blibe! Het sich mit Glägeheitsjob's Überwasser ghaute u het sech näbe bi, sir Liideschaft am male gwidmet. Er isch es wäuts Talänt, aber dsch bir Kunscht ja relativ aasichtssach! Aber we mä Technik woner het aaluegt, de het ers im Griff! Sch ihm o egau das er nid riich wird. Er fingt ihm läng das, wener jede Tag chönn ufstah u Freud ha, a däm woner macht! Nume vom male eleini cha är aber nid läbe u de schaffet er no 2 Äbe ire guete Musig-Bar. Dert chaner Gseuigkeit & sini liebi zur Musig usläbe.

Öppe die wird dr Lion scho rächt belächlet! "dä Tröimer dä!" u o viieu Froue finge ds eher abschreckend! "U nei, dsch mr ä z'gwaggelegi Gschicht!"

Bis einisch ame Donnschtig-Abe es schöns Meitschi mit blonde Chruseli ad Bar sitzt & u mit grötete Backe äs Glas Rote bi nim bsteut. Si schwümme sofort uf dr gliche Wäuelengi... & vrquatsche sich! Nach es paar Stung, sch ne vor cho wi paar Minute... hei beidi no röteri & ganz warmi Backe! U das nid nume wägem Rote! Es het ne uf aahieb dr Ermu ine gno! Isch äch das da "di Liebi ufe erscht Blick"!?

Ja, mängisch wär er froh... er hät ändi Monet no chli meh uf dr Bank. Aber solang er cha sini loufende Usgabe zahle, si Buuch nid zfescht chnurret u ner fasch au morge miteme lache uf de Lippe erwacht (u jetz sogar miteme schöne Meitschi im Arm, wo ne vrsteit) ...wird er äuä nüt ändere i sim Läbe!

hinger vrschlossene türe...

hesch dr oscho überleit was es aues für gschichte git... hinger vrschlossene türe!? schöns, truurigs, vrstörends, erstunlechs, luschtigs, schregs... & sicher no einiges meh! mä louft dür d'wäut u het d'ouge & d'ohre offe! ...& doch blibe viieu gschichte, hinger de türe vrborge. ig ha vor angerne türe gwüscht... & drbi hani so einiges vrno...bisch du o ne gwungernase & gspannt was hinger dene türe louft? söu dr di gschichtli vrzeue!? so aus bettmümpfeli!?