geschter abe nachem schwümme... dir gloubet ja nid, ha ig gluscht gha uf öppis süesses! da ig säute bis nie süessi sache däheim ha... die loufe meischtens ab, wöui zersch d'salami, dr chäs & d'grissinis isse! hani müesse kreativ si: für mi ja nid z'gröbschte problem! ;) mit inschpiration vom letschte weekend, wo öpper blätterteig-nuss-stange het gmacht... hani zum glück äm mäntig ä blätterteig kouft (ds hätti schüsch nid eifach däheim) u de isch mr da dä gipfeler vom betty bossi isinn cho! betty bossi het ja tonnewiis so cooli sache wo me, we me z'heftli überchunnt dänkt: "wie hani bis jetz ohni das chönne läbe!" ...u de äbe, bsteut me... & mä hät würklech o guet ohni das jenige welche chönne witerläbe!;) auso ig finge di sache ja aui super, o d'chochbüecher ect. ig bi sicher scho ab u zue froh gsi! aber äbe... dä gipfeler muesi ehrlech zuegä... isch scho chlei vrstoubt im chuchischäftli gstange;)
ehh, isch ja glich... ig bi ömu froh gsi hani dä gipfeler anno dazumau kouft, wöu was hätti jetz o ohni dä gmacht!?
im schäftli hani de no 60gr. gmahleni hasunüss gfunge, ha öppe 30gr. zucker drungergmischt, ä öppfu mit dr bircherraffle drzue grafflet (samt dr schale, di isch gsung), ä priise zimet & mit chlei zitronesaft abgschmöckt... s'het so ne gäbegi, füechti masse gä woni uf däm gipfeler vrteilt ha! gipfeli gformet, u für öppe 20min. (je nach brüünigs wunsch) bi 180grad i vorgwermt ofe ta u bache;) ...la abchuele u de grosszügig mit puderzucker beschtäubt! himmlisch... leu warm vrputzt, si hei abgang gha...
ig ha mir vorgno dä gipfeler i zuekunft no chlei meh z'bruche & ne nüm la z'vrstoube! ig chönnt gli mau croissant aux chocolat mache, di si leu warm usem ofe sicher o nid z'vrachte! oder de no ne sauzegi variante mit...!?
düet dir o gärn improvisiere? oder aus nume ab rezäpt? u wie heit dirs so mit de betty bossi sache?
- ä koufte, rund usgwaute kuecheteig äng mitere gable iischtäche & uf nes mit backpapier beleits bläch lege...
- 2eier mit 250-350gr. ricotta vrrüehre, 70gr. parmesan drunger mische mitere pris muskat & chli pfäffer würze & de d'masse ufem teig vrstriiche...
- ä aubergine, 2 grossi rüebli & öppe 2 zucchetti i fiini schtreife hoble...
- d'gmüesstreife kreisförmig uf d'füuig lege, drbi vo usse aafa...
- jetz no für öppe 60min zungerscht i ofe!
ä guete (sch u fein gsi... drzue no nes grüens blatt-salätli & nes somersby )ig chönnt mr guet vorsteue, dass ds ricotta bödeli no mit diversne angerne gmües u fein wär!
quelle: kraut und rüben
